திருவண்ணாமலையில் ஆக.19 முதல் ராணுவத்துக்கு ஆள் சேர்ப்பு முகாம்

திருவண்ணாமலையில் ஆகஸ்ட் 19-ஆம் தேதி முதல் 31-ஆம் தேதி வரை நடைபெறும் ராணுவத்துக்கான ஆள் சேர்ப்பு முகாமில், 7 மாவட்டங்களைச் சேர்ந்த இளைஞர்கள் கலந்துகொள்ளலாம் என்று மாவட்ட நிர்வாகம் தெரிவித்துள்ளது.

        சென்னை ராணுவ ஆள் சேர்ப்பு அலுவலகம், திருவண்ணாமலை மாவட்ட நிர்வாகம் இணைந்து ராணுவத்துக்கான ஆள் சேர்ப்பு முகாமை நடத்துகின்றன. திருவண்ணாமலை மாவட்ட விளையாட்டு அரங்கில் வரும் 19-ஆம் தேதி காலை இந்த முகாம் தொடங்குகிறது.
இதில், திருவண்ணாமலை, சென்னை, திருவள்ளூர், காஞ்சிபுரம், வேலூர், விழுப்புரம், கடலூர் மாவட்டங்கள் மற்றும் புதுச்சேரி யூனியன் பிரதேசத்தைச் சேர்ந்த தகுதியான பதினேழரை முதல் 23 வயதுக்கு உள்பட்ட இளைஞர்கள் கலந்துகொள்ளலாம் என்று தெரிவிக்கப்பட்டுள்ளது.